عارف انت ليه مش لاقى شغل؟

عارف انت ليه مش لاقى شغل؟
============================
انا عمرى 35 سنة تقريبا وبشتغل استشارى فى مجال التوظيف
اتعملى عشرات المقابلات وعملت مئات المقابلات وشوفت الاف السى فى وسمعت عن قصص وشوفت بعينى شباب زى الورد قاعد فى البيت منش لاقى شغل والاسوا انه مش عارف مش لاقى شغل ليه؟

علشان كده الموضوع ده معمول علشان نشوف مشاكلنا واخطائنا فين ونحاول نصلحها

طبعا فى شماعة جاهزة وبسيطة وبتريحنا؟

احنا كويسين وشاطرين بس البلد هى اللى وحشة وواسطة وفساد ومحسوبية...الخ

الكلام ده صحيح بس للاسف مش هو ده السبب انك مشتغلتش لغاية دلوقتى

فى اسباب تانية كتير وللاسف كتير من الاخطاء دى بسببك انت

مستعد تسمعها؟

ولا ناوى تفضل تقنع نفسك انك ضحية ومظلوم؟

لو ناوى تقعد تجادل وتكلمنى على ال30سنة فساد ولا عن الاخوان ولا عن الليبرالين ...متضيعش وقتك انا مش شابف ان ده سبب كافى لانك متشتغلش...لان فى ناس فى نفس الظروف دى اشتغلت ولسه كل يوم فى ناس حتشتغل...وهما مش احسن منك ولا معاهم واسطة ولا حاجة

تحذير

انا كلامى حيبقى جامد شوية وناشف شويتين تلاتة

بس هدفه الوحيد مصلحتك...زى الاب اللى بيزعق لابنه علشان يعلمه

توضيح

مش معنى كلامى اللى حقوله ان البلد كويسة والظروف حلوة ...ابسليوتلى....الحالة منيلة بس برده اقدر الاقى وظيفة لو مشيت على خطوات معينة

لو فهمت من كلامى ان مفيش وسايط والشغل مرطرط يبقى انت مفهمتش كلامى صح

مستعد؟

طيب قاعدة اولى:
مش تنطيط ولا حاجة بس لو معملتش 50 مقابلة على الاقل يبقى انت معندكش خبرة فى البحث عن الوظائف - وده مش عيب- لكن حاول انك متحطش استنتاجات نتيجة انك رحت مقابلتين تلاتة وتحاول تعممها على كل الشغل فى مصر

صح ولا لا؟

يالا نبدا نشوف اخطائنا ايه وكمان حنحاول نشوف مشاكلكم ايه ونحاول نحلها

ويمكن ربنا يكرمنا وتستفيد حاجة من الموضوع ده

الغلطة الأولى
-----------------
انا عمرى محشتغل شغلانة كويسة

من وانت فى الجامعة وهما بيقولوك مفيش شغل
ولو لقيت شغل حيبقى بواسطة
ولو لقيت شغل من غير بواسطة حيبقى طالب لغات وكومبيوتر
ولو لقيه مش طالب لغات يبقى المرتب كحيان وحيستعبدوك

طريقك مسدود مسدود يا ولدى!!!!!

نفسي اعرف جبت الكلام ده منين؟

انا معترف ان فى وسايط وفى شغل كحيان وفى شغل كويس وطالب لغات وكومبيوتر

بس مفيش اى شغل تانى من غير واسطة وينفع تتقبل فيه؟

الا هو انت فاكر ان القطاع الخاص مثلا كله شغال وسايط

طيب سؤال تانى مفيش حد حواليك من عيلتك من معارفك من جيرانك من اصحابك بيشتغل شغلانة كويسة من غير وسايط ؟

طيب انا اتخرجت من الجامعة وحتى الان نفسي يبقى اجرب مرة يبقى عندى واسطة ومع ذلك اشتغلت فى اماكن من احسن الاماكن فى مصر

وممكن اعدلك من زمايلاى ومعارفى عشرات اتعينوا فى اماكن احسن واحسن من غير وسايط......

صدفة؟

معتقدش وحتى لو صدفة يبقى ليه متحصلش معاك

تانى بقولك ان فى وسايط....وفى اماكن تانية كتيرة من غير واسطة

انا اعرف اماكن حكومية فى مصر (لو سمعت اسمها حتتخض) ممكن تلاقى ادارة كاملة بيتريقوا عليك دلوقتى.

عارف بيتريقوا عليك ليه؟

لانهم كلهم متعينين من غير وسايط وتدخل سيادتك تقدم عندهم وتترفض فبعد متمشى عارف بيقولوا ايه......"تلاقيه دلوقتى حيعيش نفسه فى الوهم انه اترفض علشان معهوش وسايط!!!!!!!!!!!!!!!!!!!!!!!!!!!!!"

حتقولى اصل انا قدمت كتير ومتقبلتش؟

مش معنى انك متقبلتش ان الموضوع وسايط
- ممكن تكون انت مش مؤهل كويس (عمرك محتعترف انك مش كويس)
- طيب بلاش انت كويس بس فى واحد احسن منك
-او انت ممتاز بس هى وظيفة واحدة ومقدملها 100

فكر فى اى حاجة ايجابية وسيبك بقى من الشماعة بتاعة الواسطة دى

والا يبقى ريح نفسك خالص وروح نام لان طريقك مسدود مسدود

يعنى هى المشكلة بس ان انا يائس...طيب انا مش يائس وعندى أمل فين الوظيفة بقى؟

الأمل أول خطوة وده مش كلام شعر
أصلك لو يأئس من كل حاجة مش حتقدم وحتقعد فى كل وظيفة تقول مش حتعب نفسى واقدم اصلها بالواسطة!!!
وبالتالى حتلاقى نفسك بتضيع فرص اد كده من ايدك علشان أوهام فى دماغك

دانا شوفت واحد مش راضى يقدم فى وظيفة بره مصر
ويقولى اصل الشغل بره بقى وسايط؟؟؟؟؟؟؟؟؟

ده وباء بقى وانتشر

والاجمل انك تبقى لسه متخرج ولا جربت ولا تعرف حاجة بس سمعتلك قصتين فشل فتقوم تمسك صاحبك وتقعد تملا دماغه
واسطة
واسطة
واسطة
واسطة
يقوم صاحبك كمان ينام ويروح ينيم واحد تانى
لغاية لما نلاقى المجتمع كله نايم ومستنى الحكومة تحن عليه بوظيفة

نيجى بقى للغلطة التانية اللى انت بتتكلم عنها
مهو انا عندى أمل أهو وبرده مفيش وظائف ظهرت

الغلطة الثانية:
---------------

أنا مؤهل كويس وعندى أمل ومفيش اى وظيفة ظهرتلى رغم انى قدمت فى كام شركة؟

اولا: انت بتدور على وظائف فين؟

الأجابة:
بكلم معارفى وساعات بدخل على الانترنت ابص على وظائف او لما حد من اصحابى يبلغنى

النتيجة

صفر على 10

ومستغرب يبنى انك مبتتعينش؟

هو انت فاكر ان البحث عن وظيفة هواية تعملها فى وقت فراغك

بص بقى ياباشا

حنعتبر ان الوظيفة دى لعبة أو مسابقة

بتقولك بص الشقة دى مليانة صناديق...فى صندوق منهم جواه كنز

حتعمل ايه؟
لو الف صندوق حتجرى وراهم واحد واحد وتفتحهم لغاية لما تلاقى الصندوق اللى فيه الكنز

الوظيفة كده برده

لازم تقدم كتيير اوى لغاية لما تلاقى الكنز (الوظيفة)

وبالتالى مينفعش تبقى بتقدم ست أو سبع او تلات او اربع مرات وتقولى خلاص انا عملت اللى عليا

انا لازم تقدم يوميا...أو بمعنى اصح مينفعش يبقى فى وظيفة منشورة فى مصر ومتقدمش فيها

وهو ده اللى حيزود احتمال انك تتقبل

يعنى انا اول متخرجت قعدت سنة بدون شغل

جمعت قايمة مواقع توظيف على كام منتدى على كام جرنال
وبقيت اصحى الصبح قبل مغسل وشى
افتح القايمة دى وامشى عليهم واحد واحد
واى وظيفة قدامى الاقيها اقدم فيها

مكنش ينفع يوم يعدى من غير معمل كده

والحمد لله فضل الموضوع متعب شوية لكن جاب نتيجة

ودلوقتى الدنيا بقت سهلة لان الانترنت مساعدانا اوى
انا بشوف وظائف فى اكبر الشركات وبعرف عنها من الانترنت
انا بشوف وظائف فى اتصالات وموبنيل وفودافون ...الخ

(أوعى تقول وهمية دى لسه حنجلها بعدين)

انا كل يوم اشوف موقع توظيف جديد ومنتديات التوظيف وصفحات على الفيسبوك غرقانة وظائف

ده منتدى ركن مصر ده لوحده بينشرله 100 وظيفة فى الاسبوع بتتابعهم؟

الخلاصة
أعمل لنفسك ملف جمع فيه كل روابط المواقع والمنتديات والصفحات بتاعة الوظائف
وكل ميجيلك موقع جديد ضيفه عليه (مينفعش تقول دول كفاية)

وكل يوم تصحى الصبح وراك شغلانتك الرئيسية

تاخد جولة فى كل دول وتتابعهم وظيفة وظيفة (مش نظرة عابرة) لغاية لما تلاقى حاجة تناسبك وتقدم فيها

انا باكد تانى كل يوم الصبح مقولتش بالليل ولا كل اسبوع مرة

ليه بقى؟

ليه لازم اقدم بسرعة؟
من الغلطات المهمة جدا اللى الشخص بيقع فيها انه يلاقى وظيفة ويلاقى ان التقديم مفتوح لمدة اسبوعين فيريح شوية وبعدين يبعت

فى ناس بلاقيها تشوف الوظيفة فتبدا تسال:
ياترى المرتب كام؟
ياترى الشغل من كام لكام؟
هو فى محافظة ايه؟
هو مطلوب ولاد ولا بنات؟
مفيش تليفون نتصل نسال عليه؟
وبعدين تقول بكرة ابقى اقدم
طيب بعده!!!!!!!!!!!

كده تعرف ان الوظيفة ضاعت

وبعد كل ده يقدم فطبعا اساساً محدش يعبره للانترفيو

فاسهل حاجة يقولك اصل الوظيفة وهمية او بواسطة

تعال نبص من الناحية التانية
الشركة نزلت اعلان واول منزلت الاعلان جالها الف سى فى!!!!

طبيعى جدا ساعات بيجى اكتر

تخيل لو السى فى الواحدة علشان تتفتح وتتقرى ونشوفها مناسبة ولا لا بتاخد 5 دقايق....يعنى بنتكلم على الاق على 5 الاف دقيقة يعنى بتاع 100 ساعة

وباعتبار ان بتاع الاتش ار فى الشركة سوبر مان لا بياكل ولابيشرب وحيشتغل ال8 ساعات....ومبياخدش حتى جمعة وسبت وقاعد بس للسى فى يبقى محتاج 15 يوم شغل

أنسى يا عمرو

حتى لو عندهم كام موظف طيب وحيمتحنوا الناس دى ازاى

اذا علشان نخلص نفسنا...اوقات كتير اوى بيقولك احنا عايزين 20 سى فى كويسة نكلمهم ونعملهم مقابلات فأول 100 سى فى بالكتير اوى حنبص فيهم ونطلع منهم 20 واحد نكلمهم ونعملهم مقابلات....ولو مطلعوش كويسين نبقى نشوف اللى بعديهم (وصعب انهم ميطلعوش كويسين)

احيانا كتير بيكون قبل مفترة التقديم تخلص بنكون بدانا انرتفيوهات وقبلنا ناس...وحضرتك عمال تقدم مع نفسك

طبعا حضرتك ترتيبك 500 مثلا ولا 600 فمفيش فايدة

وبتحصل حتى لما يبقوا محددين وقت للانترفيوهات (اوبن داى) فيقولك اى حد يجى من 9 -5 حنمتحنه...فسيادتك بتصحى من النوم براحتك وتظبط نفسك ويمكن تنزل تقعد مع اصحابك شوية وعلى اربعة ونص كده تروحلهم.....يكون الاتش ار زهق وصدع وقابل ناس اساسا كويسة فى اول اليوم فلو رضى يقابلك بيبقى تحصيل حاصل.....والنتيجة ان سيادتك متتقبلش وبرده تخرج تقول اصلها واسطة اصل وظيفة وهمية

الخلاصة

تشوف الوظيفة من هنا تقدم فى نفس ذات اللحظة

طيب لو عايز تعرف تفاصيل عن الوظيفة؟

يا اخى متقدم الاول وبعدين تبقى تسال براحتك هو انت بتتقدم لعروسة وحتتدبس فيها

الخطأ التالى:
الراجل ده بيشتغلكم.... جرايد ايه ومواقع ايه اللى نبص عليها محنا عارفين ان كل وظائف الجرايد والمواقع بتكون متظبطة من الأول او دعاية للشركة او وظائف وهمية على الانترنت